بعض النصائح الخاصة بالإنترفيو كده :-
------------------------------------------
1- خليك مستعد دائمآ لإتصال ال HR بيك فى أي وقت بعض الناس بيشتكوا إن فيه
أرقام غريبة بتكلمهم ومابيحقوش يردوا عليها حاول تخلي التليفون دائمآ جنبك
بقدر المستطاع بالذات بعد ما تقدم فى الشركات .
2- لما تكون حضرتك فى الشارع وجانبيك ميكروباص وفيه صوت دوشة عالي يعني
حاول تنزل من الميكروباص وتقف فى مكان هادي شوية ما تستناش إنه ال HR
هيكلمك تاني لو قالك هتصل بيك لأنه بيبقى قدامه لستة كبيرة بأرقام ناس كتير
قوي مقدمة غيرك .
3- لما يطلب منك تعمل إنترفيو على التليفون
حاول تكون محضر يعني معظم الأسئلة وحافظ إجابتها يعني علشان ما تتلبخش فى
المكالمة الأولانية .
4- لما حضرتك تروح الشركة حاول تقرى الأول
شوية عن تاريخ الشركة أنشأت إمتى مين العملاء بتوعها والمنافسين ليها
وياسلام لو دخلت على جروب زي ده وسألت عن طبيعة الإنترفيو هناك بتبقى عاملة
إزاي .
5- لما تروح الإنترفيو نفسه خليك واثق فى نفسك جدآ وإعرف
إن دي عملية تفاوض مين هيطع منه الكسبان أكيد إنت عن طريق إنك تبين كل
الحاجات الحلوة اللي فيك فى المقابلة الشخصية .
6- أوعى تكدب يعني
لو إتسألت عن حاجة وإنت مش عارف إجابتها أوعى تفتي وبرضه فى السؤال الخاص
بنقاط القوى والضعف فى شخصيتك خليك واقعي يعني ماتقولش مثلا نقطة قوتي
القراية وإنت ما بتقراش أصلا أو بتحمل المسئولية هيقولك طيب قولي موقف
إتعرضت فيه لتحمل مسئولية كدة يعني وفى السؤال بتاع نقاط الضعف فى شخصيتك
ما ينفعش تبقى مقدم فى خدمة عملاء مثلا وتقوله بتنرفز بسرعة .
7-
عند الدخول للمقابلة لو إنتي بنت وما بتسلميش خلي السي في فى إيد والشنطة
فى إيدك التانية وإعملي تحية بالراس كدة من بعيد منعا للإحراج يعني .
8- قبل الدخول طبعآ لازم بتخبط الباب وبستني إذن إنك تدخل طبعآ تجنب إنك تقعد رجل على رجل فى الإنترفيو سواء ولد أو بنت .
9- اللبس لازم يكون فورمال طبعا الولاد بدلة كامة أو قميص وبنطلون والبنات
برضه كده ممكن جيبة وقميص بس بلاش الألوان المفزعة بالنسبة للبنات الأصفر
والأحمر والميكب المبالغ فيه والبرفيوم الفازع والكعب العالي واللبانة
والحاجات اللي بتعمل صوت طول ما انتي ماشية زي الغوايش يعني وكدة .
10 - آخر المقابلة ما تنساش إنك تشكر الشخص اللي عملك المقابلة طبعآ وأوعى
تسأله عن المرتب أكيد هتعرفه قبل ما تنزل الشغل وبالتوفيق للجميع إن شاء
الله رب العالمين .
ملحوظة أخيرة : يمكن لا تكون هذه الأشياء هيى
كل المطلوبة للعمل فى الشركات ولكن هذه معظمها أسأل الله أن ينفعكم بها خير
أخوكم فى الله خالد الدفراوي .
الثلاثاء أغسطس 07, 2012 4:19 pm